இலங்கையின் எரிசக்தி நெருக்கடி குறித்த தனது கட்டுரை ஒன்றைச் சமூக வலைத்தளத்தில் பகிர்ந்தமைக்காக, ஊடகவியலாளர் சுலோசனா ரமையா மோகன் குறித்து 'எக்ஸ்' (X - முன்னாள் ட்விட்டர்) தளத்திடம் குற்றப்புலனாய்வுத் திணைக்களம் (CID) தகவல் கோரியுள்ள நடவடிக்கையைச் சுதந்திர ஊடக இயக்கம் (FMM) வன்மையாகக் கண்டித்துள்ளது.
CID முன்வைக்கும் குற்றச்சாட்டு
சிலோன் டுடே' (Ceylon Today) நாளிதழின் துணை ஆசிரியரான சுலோசனா ரமையா மோகனுக்கு 'எக்ஸ்' தளம் விடுத்துள்ள அறிவிப்பில், "மின்சக்தி அமைச்சின் பிரச்சினைகளைத் தீர்க்க அரசாங்கம் கால அவகாசம் கோருகிறது" என்ற தலைப்பில் அவர் பகிர்ந்த கட்டுரை, இலங்கையின் சட்டத்தை மீறும் வகையில் அமைந்துள்ளதாக CID உரிமை கோரியுள்ளதாகத் தெரிவிக்கப்பட்டுள்ளது.
கருத்துச் சுதந்திரத்தில் தலையீடு
எனினும், சுதந்திர ஊடக இயக்கம் இது தொடர்பில் நடத்திய ஆய்வில், குறித்த ஊடகக் கட்டுரையிலோ அல்லது சமூக வலைத்தளப் பதிவிலோ சட்டத்திற்குப் புறம்பான கூறுகள் எதுவும் காணப்படவில்லை எனத் தெரிவிக்கப்பட்டுள்ளது. CIDயின் இந்த நடவடிக்கையானது, ஊடகவியலாளர்களின் கருத்துச் சுதந்திரத்தில் மேற்கொள்ளப்படும் தேவையற்ற தலையீடு என்று அந்த இயக்கம் விவரித்துள்ளது.
பன்னாட்டுத் தரப்பினரின் கவனத்திற்கு
எரிசக்தி நெருக்கடியுடன் தொடர்புடைய ஊழல் குற்றச்சாட்டுகள் குறித்துச் செய்தி வெளியிட்டதற்காக, குறித்த ஊடகவியலாளர் பல்வேறு அச்சுறுத்தல்களை எதிர்கொள்ள நேரிடும் எனச் சுதந்திர ஊடக இயக்கம் எச்சரித்துள்ளது. அத்துடன், இந்த அச்சுறுத்தல் விவகாரம் குறித்து உள்ளூர் மற்றும் பன்னாட்டுத் தரப்பினரின் கவனத்திற்குக் கொண்டு செல்வதாகவும் அவ்வியக்கம் உறுதியளித்துள்ளது.