இசுரேலைக் கடுமையாகச் சாடிய பாகிஸ்தான்: நெதன்யாகு விடுத்த எச்சரிக்கை!

பாகிஸ்தான் பாதுகாப்பு அமைச்சர் குவாஜா ஆசிஃப், இசுரேல் இப்பகுதியின் ஒரு புற்றுநோய் என்றும், தீய இசுரேல் மனிதகுலத்திற்கே ஒரு பெருங்கேடு என்றும் கூறியிருந்தார். உலகத்தின் கவனத்தை ஈர்த்துள்ள அமெரிக்கா மற்றும் ஈரான் இடையேயான அமைதிப் பேச்சுவார்த்தைகள் நாளை (11 ஆம் நாள்) பாகிஸ்தானின் இஸ்லாமாபாத்தில் நடைபெற உள்ள நிலையில், அவர் இவ்வாறு குறிப்பிட்டிருந்தார்.

"தீய இசுரேல் மனிதகுலத்திற்கே ஒரு பெருங்கேடு. இஸ்லாமாபாத்தில் அமைதிப் பேச்சுவார்த்தைகள் நடந்துகொண்டிருக்கும் வேளையில், லெபனானில் ஒரு படுகொலை நடைபெறுகிறது. ஏதுமறியாத பொதுமக்கள் இசுரேலால் கொல்லப்படுகிறார்கள். முதலில் காசா, பின்னர் ஈரான், இப்போது லெபனான் எனத் தொடர்கிறது. இந்த அரசு ஒரு புற்றுநோய் போன்றது. பாலத்தீன நிலத்தைப் பறித்தெடுத்த ஐரோப்பிய யூதர்கள் நரக நெருப்பில் எரிந்து சாம்பலாவார்கள் என்று நான் நம்பி வேண்டுகிறேன்" என்று அவர் தமது பதிவில் தெரிவித்திருந்தார்.

இருப்பினும், அமைதிப் பேச்சுவார்த்தைகளின் போது அதன் நடுநிலையான இடையீட்டாளர் (நடுவர்) அத்தகைய அறிக்கையை வெளியிட்டதை இசுரேல் கடுமையாக எதிர்த்துள்ளது. யூத அரசு ஒரு புற்றுநோய் என்ற யூதப் பகைமைக் கூற்று, அது முற்றிலுமாக அழிக்கப்பட வேண்டும் என்பதை மறைமுகமாக உணர்த்துவதாக இசுரேல் குற்றம் சாட்டியது.

இசுரேலியத் தலைமையமைச்சரின் அலுவலகம் இந்தக் கூற்றை வன்மையாகப் புறக்கணித்ததுடன், இது எந்தவொரு அரசாங்கத்திடமிருந்தும், குறிப்பாக அமைதிக்கான நடுநிலை இடையீட்டாளர் என்று கூறிக்கொள்ளும் ஒரு அரசாங்கத்திடமிருந்தும் எதிர்பார்க்கப்படாத ஒரு கூற்று எனக் குறிப்பிட்டது.

இருப்பினும், இசுரேலின் இந்தச் சூடான பதிலடிக்குப் பிறகு, பாகிஸ்தான் பாதுகாப்பு அமைச்சர் தனது அந்தப் பதிவை நீக்கிவிட்டதாகச் செய்திகள் வெளியாகியுள்ளன.