செம்மணி மனிதப் புதைகுழி விடயத்தில் பாதிக்கப்பட்ட தமிழ் குடும்பங்களைப் பிரதிநிதித்துவப்படுத்தும் சட்டத்தரணிகள், ஐ.நா. மனித உரிமைகள் ஆணையாளர் வோல்கர் டேர்க்கிடம், தற்போதைய அகழ்வாராய்ச்சி பணிகள் பன்னாட்டு மேற்பார்வையின் கீழ் நடைபெற வேண்டும் என வலியுறுத்தியுள்ளனர். நீதி மற்றும் வெளிப்படைத்தன்மைக்கான கோரிக்கைகள் வலுப்பெறும் நிலையில் இந்த அழைப்பு விடுக்கப்பட்டுள்ளது.
புதன்கிழமை (25.06.2025) யாழ்ப்பாணத்திற்கு விஜயம் செய்த டேர்க், சிறிலங்கா அரசால் தமிழர்களுக்கு எதிராக இழைக்கப்பட்ட அரச ஆதரவு வன்முறைகள், அட்டூழியங்களுடன் தொடர்புடைய செம்மணி மனிதப் புதைகுழி தளத்தை நேரில் பார்வையிட்டார். இந்தப் பயணத்தின்போது, அவர் வழக்கு தொடர்பான சட்டப் பிரதிநிதிகளைச் சந்தித்து, விசாரணையின் தற்போதைய நிலை குறித்து விசாரித்தார்.
சட்டத்தரணிகளின் கோரிக்கைகள்:
ஊடக சந்திப்பில், சட்டத்தரணிகள் ஐ.நா. அதிகாரியிடம் முன்வைத்த அவசர கோரிக்கைகளை விவரித்தனர்:
- தடையற்ற நிதி ஒதுக்கீடு: அகழ்வாராய்ச்சிக்கு சிறிலங்கா அரசு உடனடியாக, தடையின்றி நிதி வழங்க வேண்டும்;. அதற்கு பன்னாட்டுச் சமூகத்தின் அழுத்தம் தேவை.
- பாதுகாப்பான எச்சங்கள் பாதுகாப்பு: யாழ்ப்பாணத்தில் பாதுகாப்பு வசதிகள் இல்லாததால், மீட்கப்பட்ட எலும்புக்கூடு எச்சங்களை நீண்டகால தீர்வு எட்டப்படும் வரை கொழும்பிற்கு மாற்ற வேண்டும்.
- வடக்கு-கிழக்கில் தடயவியல் கட்டமைப்பு: எச்சங்களை பாதுகாப்பாகவும், வெளிப்படையாகவும் ஆய்வு செய்ய யாழ்ப்பாணத்தில் தடயவியல் ஆய்வகம் அமைக்கப்பட வேண்டும். இது எதிர்கால பொறுப்புக்கூறலுக்கு முக்கியமானது.
- தடயவியல் நிபுணர்கள் மற்றும் தொழில்நுட்பம்: அதிநவீன தடயவியல் கருவிகள் மற்றும் தகுதியான நிபுணர்கள் அகழ்வு மற்றும் அடையாளம் காணுதலுக்கு அவசியம்.
- பன்னாட்டு மேற்பார்வை: நடுநிலைத்தன்மையை உறுதிப்படுத்தவும், தலையீட்டைத் தடுக்கவும் சுதந்திரமான பன்னாட்டு நிபுணர்களின் பங்கேற்புடன் அகழ்வு நடத்தப்பட வேண்டும்.
நீண்டகாலமாக தாமதிக்கப்பட்ட செம்மணி புதைகுழி விசாரணையில் வெளிப்படைத்தன்மை, நீதி மற்றும் பொறுப்புக்கூறலை உறுதி செய்ய இந்த கோரிக்கைகள் அவசியம் என சட்டக் குழு தெரிவித்தது.
பின்னணி மற்றும் சமீபத்திய முன்னேற்றங்கள்:
1998இல் சிறிலங்கா இராணுவத்தைச் சேர்ந்த சோமரத்ன ராஜபக்சவின் சாட்சியத்தால் செம்மணி மனிதப் புதைகுழி பொதுவெளிக்கு வந்தது. அவர், இராணுவத்தால் கொல்லப்பட்ட நூற்றுக்கணக்கான தமிழர்கள் அப்பகுதியில் புதைக்கப்பட்டதாக சாட்சியத்தினை வழங்கியிருந்தார். 1999இல் ஆரம்ப அகழ்வுகளில் 15 சடலங்கள் கண்டெடுக்கப்பட்டன, ஆனால் விசாரணை பின்னர் தேங்கியது.
சமீபத்தில், குழந்தைகள் உட்பட மேலும் 19 எலும்புக்கூடு எச்சங்கள் கண்டுபிடிக்கப்பட்டதால், மீண்டும் சீற்றமும், பன்னாட்டு நடவடிக்கைக்கான கோரிக்கைகளும் எழுந்துள்ளன. தமிழ் குடும்பங்கள் மற்றும் சிவில் சமூகக் குழுக்கள் உள்நாட்டு பொறிமுறைகளை பலனற்றவை மற்றும் சமரசம் செய்யப்பட்டவை என நிராகரித்து, ஏற்படக்கூடிய தடங்கல்கள் மற்றும் அரசியல் தலையீடுகளை சுட்டிக்காட்டுகின்றனர்.
டேர்க்கின் அறிக்கைகள்:
டேர்க், இலங்கைக்கு மேற்கொண்ட பரந்த பயணத்தின் போது, கடந்தகால வன்முறைகளிற்கு நீதி, பொறுப்புக்கூறல் மற்றும் சுதந்திரமான விசாரணைகளின் அவசியத்தை வலியுறுத்தினார். செம்மணி தளத்தை பார்வையிட்டபோது, “கடந்தகாலம், வேதனை தரும் கடந்தகாலம், மிகவும் தெளிவாகத் தெரியும் இடங்களைப் பார்வையிடுவது எப்போதும் உணர்வுபூர்வமானது,” என அவர் கூறினார்
தடயவியல் நிபுணத்துவத்துடன் கூடிய சுதந்திரமான நிபுணர்களால் முழுமையான, வலுவான விசாரணைகள் உண்மையை வெளிக்கொணரவும், காணாமல் போனவர்களின் குடும்பங்களுக்கு ஆறுதல் அளிக்கவும் அவசியம் என அவர் மீண்டும் வலியுறுத்தினார்.
